Amahugurwa ya AMI atangwa kuri interineti: Amasomo ku guhangana n’ingorane no kwigira ku bandi

Ubuhamya: Yannick Tuyishime, Umuyobozi Mukuru, akaba no mu bashinze Tsapal Company Ltd

Yannick Tuyishime ni Umuyobozi Mukuru, akaba no mu bashinze Tsapal Company Ltd, ikigo gikora inkweto n’imyenda kuva mu mpera za 2019.  Iki kigo niho cyari kigitangira ubwo icyorezo cya COVID-19 cyadukaga, ariko amahugurwa ya AMI yabafashije gukomeza gukora ibikorwa by’ubucuruzi byabo mu gihe cy’icyorezo.

“Mu gihe twagiraga igitekerezo cyo gutangiza ikigo cyacu, twari twabonye ko hari ibibazo byinshi mu muryango nyarwanda dushobora kugiramo uruhare mu gukemura. Icya mbere ni uko hari abantu benshi badafite akazi mu Rwanda no muri Afurika. Ikindi ni uko tubona ko dushobora gukora ikintu gishobora guteza imbere ibikorerwa mu Rwanda. Bitewe n’uko imisoro n’amahoro ku bicuruzwa bitumizwa hanze bihanitse mu Rwanda, turamutse twongereye ibikorerwa mu Rwanda, dushobora kuziba icyo cyuho ibiciro bikagabanuka kuko ibicuruzwa byaba bikorewe mu gihugu.”

Mu mahugurwa ya AMI, Yannick yigiyemo uburyo bwo gucunga neza imikoreshereze y’amafaranga, kumvikana n’abo akodeshereza inzu, kunoza uburyo bwo guhanahana amakuru hagati y’abakozi n’abakiriya, hamwe no gusesengura no gukora igenamigambi mu rwego rwo guhangana n’ingorane. Ibi byatumye agabanyirizwa amafaranga akodesha inzu mu bihe byari bikomeye bya Gahunda ya Guma mu rugo, hamwe no kugumana abakozi bose yakoreshaga binyuze mu kugabanya imishahara n’amafaranga yakoreshwaga mu bintu bitari ngombwa. Ikigo cyanagabanyije ibiciro bya bimwe mu bicuruzwa hagamijwe kugumana abakiriya kugira ngo batabatakaza mu gihe cy’icyorezo.

Yannick arashishikariza abandi ba rwiyemezamirimo b’Abanyarwanda kwitabira amasomo ya AMI hamwe n’amahugurwa ari imbere kugira ngo na bo babashe kuyungukiramo kandi banige uburyo bwo guhangana n’ingorane, kumvikana n’abakiriya ndetse n’ababagemurira ibicuruzwa, kandi bashyire mu bikorwa intego bafite, banahangana n’imbogamizi ziboneka muri iyi minsi.

“Nshimishijwe n’amahugurwa ya AMI kubera ko ubu noneho nandika amafaranga yose yakoreshejwe mu bikorwa by’ubucuruzi buri cyumweru kandi ngakoresha gahunda yo gucunga neza ubucuruzi. Ikindi ni uko nize uburyo bwo gusesengura ingorane – nk’ubu ngubu, icyo nigiye mu mahugurwa ya AMI ni uko nshobora kwicara nkabasha kubona ibitagenda neza mu bijyanye no gucunga amafaranga. Nshobora gukora gahunda y’ibikorwa nifashisha mu guhangana n’ingorane nasesenguye. Mbikuye ku mutima, sinzi uko nashimira AMI, kandi ndashishikariza abantu bose kwitabira amahugurwa ya AMI, abamaze kuyitabira bakaba bakwiga andi masomo batanga. Niba ushaka gukora ubucuruzi ku buryo burambye, amahugurwa ya AMI azagufasha rwose.”