Access to Finance Rwanda, ConsumerCentriX n’Abafatanyabikorwa Bishimiye 

Gutangaza Abatsindiye Ibihembo bya SME Response Clinic 

• Ibigo bitatu by’ubucuruzi binyuranye byatsindiye ibihembo bitangwa na SME Response Clinic ku nshuro ya mbere bihwanye na miliyoni y’amafaranga y’u Rwanda 

• Abatsindiye ibihembo batoranyijwe nyuma y’uko abagera ku 1200 mu gihugu cyose batanze amazina 
• Icyiciro cy’ibigo bitanu byaje ku mwanya wa kabiri batewe inkunga yo gukurikira amahugurwa y’amezi atandatu azabungura ubuhanga mu by’ubucuruzi nta kiguzi 

Uyu munsi Access to Finance Rwanda na ConsumerCentriX batangaje amazina y’abatsindiye ibihembo bya  SME Response Clinic ku nshuro ya mbere nyuma y’ubukangurambaga bwiswe Twiteze Imbere bwo kuzirikana uruhare rw’ibigo by’ubucuruzi buto mu gufasha u Rwanda kwigobotora ingaruka zatewe n’icyorezo cya COVID-19. 

Muri ubwo bukangurambaga, abantu bose muri rusange batanze amazina y’ibigo by’ubucuruzi buto, babiha amahirwe yo gutsindira igihembo cya SME Response Clinic. Irushanwa ryari rigizwe n’ibyiciro bitatu: ibigo by’ubucuruzi byashinzwe cyangwa biyoborwa n’abagore, icy’ibigo by’ubucuruzi bikiyubaka cyangwa ibifite udushya hamwe n’ibigo byamaze gukomera. Abanyarwanda batoye ibigo baha amahirwe bifashishije urubuga rwa SME Response Clinic na terefoni. 

Ibigo by’ubucuruzi buto bitatu byegukanye imyanya ya mbere muri buri cyiciro, ibyaje ku mwanya wa kabiri, ndetse n’ibigo 30 byashyizwe ku rutonde nyuma y’ijonjora ry’ibanze byose byatoranyijwe hakurikijwe isuzuma ryimbitse. Access to Finance Rwanda na Consumer Centrix binejejwe no gutangaza ko abatsinze n’abaje ku myanya ya kabiri ari: 

• Icyiciro cy’ibigo by’ubucuruzi biyoborwa n’abagore 

1. 1. Ku mwanya wa mbere: Kurema Kureba Kwiga, Ikigo gikora ibijyanye n’ubugeni giherereye i Kigali 
   2. Ku mwanya wa kabiri: Kicirwanda, ikigo gifite ububiko bw’ibikoresho by’ubugeni n’ubukorikori buherereye i Kigali 

• Icyiciro cy’ibigo by’ubucuruzi buto bikiyubaka cyangwa ibifite udushya: 

1. 1. Ku mwanya wa mbere: HADI Constructions, ikigo cy’ubwubatsi gikorera mu karere ka Nyagatare 
   2. Ku mwanya wa kabiri: Bhiku Bakery, ikigo gikora imigati cyo mu karere ka Rwamagana na Johnson’s Bakery yo mu karere ka Kicukiro, umujyi wa Kigali 

• Icyiciro cy’ibigo by’ubucuruzi buto bimaze gukomera: 

1. 1. Ku mwanya wa mbere: Umucyo Company, ikigo gikora isabune zisukika giherereye mu karere ka Kirehe 
   2. Ku mwanya wa kabiri: Blessed Garden, inzu yakira ba mukerarugendo iyobowe n’umugore iherereye mu karere ka Kayonza na Crema, iduka ricuruza ikawa mu mujyi wa Musanze 

Ibi bihembo bije bikurikira ubukangurambaga bwiswe ‘Twiteze Imbere’ bwateguwe na SME Response Clinic bwari bugamije kwishimira uburyo ibigo by’ubucuruzi buto byabashije guhangana n’ibihe bikomeye no kuzirikana uruhare rwabyo mu rugendo rwo kuzahura ubukungu bw’u Rwanda. SME Response Clinic ni ihuriro ryashyizweho na Access to Finance 

Rwanda na ConsumerCentrix ku bufatanye n’Urugaga rw’Abikorera mu Rwanda (PSF), Ishyirahamwe ry’Ibigo by’Imari Iciriritse Bikorera mu Rwanda (AMIR), Ikigo Nyafurika Kigamije Guteza Imbere Imiyoborere (AMI), New Faces New Voices Rwanda, n’Ishyirahamwe ry’Amabanki mu Rwanda. 

Asobanura iby’ibi bihembo n’ubukangurambaga, Jean Bosco Iyacu, Umuyobozi Mukuru wa Access to Finance mu Rwanda, aragira ati: “Twishimiye abatsindiye ibihembo bya SME Response Clinic n’icyiciro cy’ibigo byaje ku mwanya wa kabiri. Mu byumweru bicye ubukangurambaga bwamaze, habashije gutora abantu bagera ku 1200 mu gihugu cyose. Twishimiye kubona hatorwa ibigo by’ubucuruzi buto mu ngeri zinyuranye, ishyaka n’akanyamuneza k’ababigana, ndetse n’uruhare biri kugira mu guteza imbere aho biherereye muri uru rugendo turimo rwo kuzahura ubukungu bw’igihugu bwashegeshwe n’icyorezo cya COVID-19.” 

Yarongeye ati: “Turashimira buri muntu wese wagize uruhare mu bukangurambaga bwiswe Twiteze Imbere, abafatanyabikorwa, ndetse n’ibitangazamakuru dufatanya byadufashije gusakaza amakuru kuri ubwo bukangurambaga. Birashimishije kubona SME Response Clinic ibasha kugera ku bigo by’ubucuruzi buto muri buri gice cyose cy’iki gihugu kandi tuzakomeza kubishyigikira muri ibi bihe bikomeye na nyuma yaho”. 

Judith Kaine, umuyobozi wa Kurema Kureba Kwiga, kimwe mu bigo by’ubucuruzi byatsindiye igihembo yagize ati: “Ni ishema kuri jye kandi nejejwe no kuba umwe mu batsindiye ibihembo bya SME Response Clinic. Iki gihembo ni icyo kuzirikana uruhare rw’ingenzi abahanzi bagira mu rwego rw’ubukungu kandi igihembo cy’amafaranga kizafasha ubucuruzi bwanjye gutera imbere. Ndashimira SME Response Clinic n’abafatanyabikorwa bayo kuba barateguye ubu bukangurambaga no kuba batekereza ku bigo by’ubucuruzi buto.” 

Ikigo cy’ubucuruzi buto cyatsinze muri buri cyiciro kizahabwa igihembo cy’amafaranga y’u Rwanda angana na miliyoni imwe (1,000,000) yakwifashishwa mu bucuruzi bwabo, ndetse na serivisi z’ubujyanama zitangwa n’inzobere mu bijyanye n’ubucuruzi nta kiguzi. Icyiciro cy’ubucuruzi bwatsinze ku mwanya wa kabiri kizahabwa inkunga yo gukurikirana amahugurwa atangwa n’Ikigo Nyafurika Kigamije Guteza Imbere Imiyoborere (AMI), yiswe “Komeza Utere Imbere – Survive to Thrive” aho ba rwiyemezamirimo bazamenya uko bahangana n’ibibazo bahura nabyo mu bucuruzi bakanahahurira n’abandi bacuruzi bo mu Rwanda no muri Afurika. 

Ibyerekeye SME Response Clinic 

Muri Gicurasi 2020, Access to Finance Rwanda (AFR) yafatanyije na Consumer Centrix hatangizwa icyiswe SME Response Clinic; ihuriro rifasha ba rwiyemezamirimo bagerageza guhangana n’icyorezo cyugarije isi cya COVID-19. SME Response Clinic igenera ba rwiyemezamirimo bo mu Rwanda bagerageza kumenyera imiterere y’ubucuruzi bwazanywe n’icyorezo cya COVID-19, amahugurwa, ubujyanama ku bigezweho, n’uburyo bw’icungamari. Ku bindi bisobanuro, wasura urubuga smeresponse.clinic 

Ibyerekeye Access to Finance Rwanda 

AFR yatangiye ibikorwa byayo muri 2010 ifite intego nyamukuru yo guteza imbere urwego rw’imari mu Rwanda. AFR igamije gukuraho inzitizi zo muri sosiyete tubamo zibuza abantu kubona serivisi zijyanye n’imari hibandwa ku bantu binjiza macye, cyane cyane abatishoboye n’abagore bo mu cyaro. AFR ishyigikira iterambere n’itangwa rya serivisi z’imari zirimo ubwizigame, gutanga inguzanyo, ubwishingizi, ubwishyu, no guhererekanya amafaranga. Ushobora kubona amakuru kuri AFR unyuze ku rubuga rwa afr.rw 

Ibyerekeye ConsumerCentriX 

ConsumerCentriX ni sosiyete y’inzobere mu bijyanye no gushyiraho ingamba ikorana n’abatanga serivisi z’imari n’abashyiraho za politiki. Iyo sosiyete ihindura ibitekerezo by’abaguzi mo ingamba na politiki zijyanye n’imiterere y’isoko hagamijwe kwegera abantu badakunze kubona izo serivisi. Icyo tugamije ni ugutanga ibisubizo bishobora guhinduka bigendeye ku bitekerezo bihamye bijyanye n’imibereho, ibikenewe, n’imbogamizi z’abantu badakunze kubona serivisi z’imari mu masoko agenda avuka hagamijwe kuzamura imibereho yabo no guhanga imirimo bateza imbere ubukungu. 

Aho wabariza amakuru 

Niba hari ibyo wifuza kubaza, andikira Nadege Nzeyimana, Inzobere mu bijyanye n’Ihererekanyamakuru muri AFR kuri nadege@afr.rw.